ខេត្តសៀមរាប ៖ ទំនប់ម្កាក់ស្ថិតនៅភូមិម្កាក់ ឃុំគោកធ្លកលើ ស្រុកជីក្រែង ខេត្តសៀមរាប ដែលមានទីតាំងស្ថិតនៅបែកខាងជើងស្រុកជីក្រែង មានចំងាយប្រមាណ ១៣គីឡូម៉ែត្រ ពីផ្លូវជាតិលេខ៦ បានកំពុងទាក់ទាញភ្ញៀវទេសចរណ៍ ទៅ កម្សាន្ត ។ បើនិយាយពីប្រវត្តិកាលទំនប់ម្កាក់នេះ គឺ ត្រូវបានសាងសង់ឡើងក្នុងឆ្នាំ១៩៧០ ក្នុងតំបន់រំដោះ ដោយ ពួកខ្មែរក្រហមបានយកពួកទាហាន លន់ ណុល ព្រះសង្ឃ មន្ត្រីរាជការ ដែលចាប់បាន ទៅឲ្យធ្វើពលកម្មជាទម្ងន់នៅ ទីនោះ ។ ចាប់ឆ្នាំ១៩៧៤ មកដល់ឆ្នាំ១៩៧៩ ពួកខ្មែរក្រហមបានវាយសម្រុងធ្វើទំនប់នេះទាំងថ្ងៃទាំងយប់ ដែលបាន ធ្វើឲ្យកម្លាំងកងចល័តយុវជន នារី ក៏ដូចជាអ្នក ជានិន្នាការជាទាហាន មន្ត្រីរាជការ ព្រះសង្ឃ និង កុមារ បានស្លាប់ជា ច្រើននៅទីនេះផងដែរ ។
តាមការបញ្ជាក់របស់លោក ទូច ទ្រី ប្រធានក្រុមប្រឹក្សាឃុំគោកធ្លកលើ បានឲ្យដឹងថា ក្រោយថ្ងៃជ័យជំនះ ៧មករា ១៩៧៩ ទំនប់ម្កាក់នេះ ត្រូវបានរាជរដ្ឋាភិបាលកម្ពុជា បានធ្វើការជួសជុល ដើមី្បស្តុបទឹកធ្វើស្រែទាំងប្រាំង និង វស្សា ក៏ប៉ុន្តែអាងទឹកនេះ ពុំបានធានាការផ្ទុកទឹកប្រើប្រាស់ធ្វើស្រែរបស់ប្រជាកសិករទាំង ០៨ឃុំនៃស្រុកជីក្រែង បានឡើយ ។ លោកបានបន្តទៀតថា ក្រោមកិច្ចដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៅឆ្នាំ២០១៥ ក្រសួងធនធានទឹក និង ឧតុនិយម រួមសហការជាមួយក្រុមវិស្វករនៃសាធារណរដ្ឋប្រជាមានិតចិន បានធ្វើការជួសជុល ស្ថាបនានូវទ្វារទឹក និង ទំនប់បង្ហៀរទឹក ព្រមទាំងប្រអប់ទ្វារទឹកចែកចាយ ក្នុងការស្រោចស្រពផលដំណាំស្រូវ ដែល បច្ចុប្បន្ននេះនៅមិនទាន់សាងសង់រួចរាល់នៅឡើយ។ លោក ទូច ទ្រី បានបន្តទៀតថា ក្នុងរយៈពេលប៉ុន្មានថ្ងៃមក នេះ ក្នុងឱកាសបុណ្យភ្ជុំបិណ្ឌ តំបន់ទំនប់ម្កាក់នេះ បានកំពុងធ្វើការទាក់ទាញអារម្មណ៍របស់ភ្ញៀវទេចរជាតិ អន្តរ ជាតិ ចូលមកទស្សនាកម្សាន្តសប្បាយ ជាលក្ខណៈគ្រួសារ ។ លោកបានឲ្យដឹងទៀតថា នៅរៀលថ្ងៃនេះ មានបង ប្អូន ប្រជាពលរដ្ឋយើង មកពីក្នុងក្រុង ស្រុកនៃខេត្តសៀមរាប ក៏ដូចបណ្តាខេត្តនានា បានចូលមកលេងកម្សាន្តនៅទំបន់ម្កាក់នេះ។ សំខាន់នៅថ្ងៃឈប់សម្រាករបស់មន្ត្រីរាជការ បុគ្គលិកក្រុមហ៊ុន ក៏ដូចប្រជាពលរដ្ឋឯទៀត បានមកកម្សាន្ត មុជទឹកដ៏ត្រជាក់នៃអាងទឹកម្កាក់នេះផងដែរ ។ លោកប្រធានក្រុមប្រឹក្សាឃុំក៏បានលើកផងដែរថា ដោយនឹងស្មានមិន ដល់ថាតំបន់ទំនប់ម្កាក់នេះ បានទាក់ទាញអារម្មណ៍ភ្ញៀវចូលមកកម្សាន្តបានយ៉ាងច្រើនកុះករយ៉ាងនេះឡើយ ។ ម៉្យាង ទៀតចំពោះសេវាកម្មក្នុងបម្រើភ្ញៀវ ក៏មិនទាន់បានសមស្របនៅឡើយ ពីព្រោះការកើតឡើងដោយមិនបានប្រៀងទុក ហាក់ដូចជាភាពចៃដន របស់បងប្អូនប្រជាពលរដ្ឋនៅក្នុងភូមិម្កាក់នេះផងដែរ ។ លោក ទូច ទ្រី បានបន្ថែមទៀតថា បច្ចុប្បន្ននេះ អាជ្ញាធរបានយកចិត្តទុកដាក់ចំពោះបញ្ហា សន្តិសុខ សណ្តាប់ធ្នាប់សាធារណៈ រួមទាំងបរិស្ថានក្នុងតំបន់ នេះ ហើយនៅចំពោះមុខអាជ្ញាធរឃុំ នឹងធ្វើការរៀបចំទីតាំង នៅតាមដងទំបន់នេះ ឲ្យមានសណ្តាប់ធ្នាប់ល្អ ទាំងការ ងារចរាចរណ៍ ការរៀបចំទីសំណាក់របស់ភ្ញៀវឲ្យបានត្រឹមត្រូវ ចំណតរថយន្ត ការវិចខ្ចប់ទុកដាក់សម្រាម ដើមី្បជៀស វាងក្នុងការបំពុលបរិស្ថាន នៃតំបន់ទេសចរណ៍កែច្នៃមួយនេះ ឲ្យសមស្របទៅតាមស្តង់ដារ របស់ក្រសួងទេសចរណ៍ និង តាមការណែនាំរបស់អាជ្ញាធរខេត្តផងដែរ ។ លោកក៏បានឲ្យដឹងទៀតថា នៅពេលខាងមុខនេះ អាជ្ញាធរឃុំ នឹងធ្វើ ការរៀបចំសមាគមន៍មូលដ្ឋាន ក្នុងការគ្រប់គ្រងទូក កាណូត សម្រាប់ភ្ញៀវជឹះកម្សាន្ត រួមទាំងធ្វើការរៀបចំនូវបង្គន់អនាម័យ ក្នុងការបម្រើភ្ញៀវមកកាន់ទីនេះ និង រៀបចំកម្លាំងក្នុងការជួយសង្រ្គោះនៅពេលមានយថាហេតុណាមួយ កើតឡើង ហើយភ្ញៀវទេសចរណ៍ គឺជាឆ្នាំងបាយរបស់ប្រជាពលរដ្ឋភូមិម្កាក់នេះផងដែរ ។
ក្នុងនោះដែរក៏មានបងប្អូនប្រជាពលរដ្ឋ ដែលបានចុះទៅមុជទឹកកម្សាន្តនៅក្រោមទំនប់បង្ហៀរនេះ សូមឲ្យអាជ្ញាធរឃុំ សុំក្រុមហ៊ុនចិន ធ្វើកាំជណ្តើរចុះទៅក្រោមស្ពាន ដើមី្បងាយស្រួលភ្ញៀវចុះទៅមុជទឹក ទាំងចាស់ទាំងក្មេង រួមទាំង សូមធ្វើនូវរនាំងការពារនៅផ្នែកខាងក្រោម ដើមី្បការពារនូវប្រការណាមួយកើតឡើង និង សូមរៀបចំនូវធុងសម្រាម ដើមី្បជៀសវាងការចោលសម្រាមពាសវាលពាសកាល ធ្វើឲ្យប៉ះពាល់បរិស្ថានតំបន់នេះ ៕ អត្ថបទ ម៉ី សុខារិទ្ធ
