ខេត្តសៀមរាប ៖ នាចុងសប្តាហ៍ថ្ងៃសុក្រទី ១១ ខែវិច្ឆិកា ឆ្នាំ២០១៦ នៅសាកលវិទ្យាល័យអង្គរខេត្តសៀមរាប មានធ្វើពិធីប្រគល់ និង ទទួលសញ្ញាបត្របណ្ឌិតកិត្តិយស ពីសាកលវិទ្យាល័យ ញ៉ូនីវ័រស៊ីដាត អ៊ីមប្រេសសារ៉ល ដឺកូស្តារីកា ជូនដល់ ឯកឧត្តមបណ្ឌិត ឃឹម ប៊ុនសុង អភិបាលនៃគណៈអភិបាលខេត្ត ឯកឧត្តម នូ ផល្លា ប្រធានក្រុមប្រឹក្សាខេត្ត និងលោក ចាន់ ឃុង មេបញ្ជាការរងកងរាជអាវុធហត្ថខេត្ត ដោយមានការអញ្ជើញចូលរួមរបស់ឯ.ឧបណ្ឌិតឧកញ៉ា សៀង ណាំ សាកលវិទ្យាធិការ នៃសាកលវិទ្យាល័យអង្គរ និង ជាអ្នកតំណាងរាស្ត្រខេត្តសៀមរាប រួមទាំងឯកឧត្តម លោកជំទាវ ជាសមាជិកក្រុមប្រឹក្សាខេត្ត គណៈអភិបាលខេត្ត អស់លោក លោកស្រីជាថ្នាក់ដឹកនាំមន្ទីរ អាជ្ញាធរក្រុង ស្រុក មន្ត្រីរាជការ និង សាស្ត្រាចារ្យ ក្រុមយុវជនកាយរិទ្ធ យុវជនកាកបាទក្រហមកម្ពុជាផងដែរ ។
ក្នុងកិច្ចស្វាគមន៍នោះឯកឧត្តមបណ្ឌិតឧកញ៉ា សៀង ណាំ បានធ្វើការបញ្ជាក់ថាបុព្វហេតុនៃការសម្រេចផ្តល់ សញ្ញាបត្របណ្ឌិតកិត្តិយស ជូនដល់ថ្នាក់ដឹកនាំជាន់ខ្ពស់ ដែលមានស្នាដៃក្នុងការកសាងគុណសម្បត្តិជាច្រើន ក្នុង ការគ្រប់គ្រង អភិវឌ្ឍន៍ឲ្យមានការរីកចម្រើន ព្រមទាំងការកសាងហេដ្ឋារចនាសម្ព័ន្ធ ស្ពាន លូ ប្រឡាយ សាលា រៀន មណ្ឌលសុខភាព និង វត្តអារាមផងដែរ ។ ឯកឧត្តមបណ្ឌិតឧកញ៉ា ក៏មានសង្ឃឹមជឿជាក់ថា ឥស្សរជនទាំងបី រូប និង បន្តការកសាង អភិវឌ្ឍន៍សង្គម សំខាន់នៅលើទឹកដីប្រវត្តិសាស្ត្រសៀមរាបឲ្យកាន់តែមានភាពរីកចម្រើន។ ទាំងនេះក៏ក្រោមកិច្ចសហប្រតិបត្តិការគ្នាល្អ រវាងសាកលវិទ្យាល័យអង្គរ និង សាកលវិទ្យាល័យUNIVERSIDAT EMPRESARIAL DE COSTA RICAលើវិស័យអប់រំ ដើមី្បជម្រុញឲ្យការបណ្តុះបណ្តាលធនធាន មនុស្ស នៅ សាកលវិទ្យាល័យទាំងពីរ ឲ្យកាន់តែមានគុណភាព និង ប្រសិទ្ធិភាពខ្ពស់ ។
មានប្រសាសន៍នោះដែរ លោកបណ្ឌិត GEOGE REIFF សាកលវិទ្យាធិការនៃសាកលវិទ្យាល័យ UNIVERSIDAD EMPRESARIAL DE COSTRA RICA និង ប្រសាសន៍របស់លោកបណ្ឌិត TRULY BRUSCH បានបញ្ជាក់អំពីលក្ខ័ន្តក្នុងការវាយតម្លៃ ដើមី្បបុគ្គលទាំង៣រូប បានទទួលសញ្ញាបត្របណ្ឌិតកិត្តិយស ដោយផ្អែកលើសេចក្តីយកចិត្តទុកដាក់ ទទួលខុសត្រូវ ក្នុងការបម្រែបម្រួលសង្គម ដើមី្បអភិវឌ្ឍន៍នៅខេត្តសៀមរាប ទើបគណៈកម្មការ នៃសាកលវិទ្យាល័យ UNIVERSIDAD EMPRESARIAL DE COSTRA RICA ប្រគល់នូវសញ្ញាបត្របណ្ឌិតកិត្តិយស ដើមី្បឲ្យសាកសមតាមគុណប្បការៈ ដែលបានលះបង់ និង ចូលរួមវិភាគទាន ក្នុងការដឹកនាំ គ្រប់គ្រង អភិវឌ្ឍន៍គ្រប់វិស័យក្នុងខេត្តសៀមរាប ។
ឯកឧត្តមបណ្ឌិត ឃឹម ប៊ុនសុង ក៏បានគូសបញ្ជាក់ថា ការប្រគល់សញ្ញាបត្រកិត្តិយសសម្រាប់រូបខ្ញុំ និង ឯកឧត្តមប្រធានក្រុមបឹក្សាខេត្តនាពេលនេះ ក៏សរបញ្ជាក់ឲ្យឃើញ មិនត្រឹមតែការទទួលស្គាល់នូវកិច្ចខិតខំ ប្រឹងប្រែងរបស់ ថ្នាក់ដឹកនាំប៉ុណ្ណោះទេ ប៉ុន្តែក៏ជាការទទួលស្គាល់ផងដែរនូវកិច្ចប្រឹងប្រែងរួមគ្នា របស់អាជ្ញាធរខេត្តទាំងមូល ក្រោមការដឹកនាំដ៏ត្រឹមត្រូវ របស់ប្រមុខរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានខិតខំសម្រេចនូវលទ្ធផលជាផ្លែផ្កាក្នុងការផ្តល់នូវសុខសន្តិភាព សុខុមាលភាពសង្គម និងការអភិវឌ្ឍសេដ្ឋកិច្ចនៅកម្ពុជា ហើយបានរួមចំណែកយ៉ាងសំខាន់ដល់សន្តិភាព ស្ថិរភាព និងវឌ្ឍភាពក្នុងតំបន់ ទាំងផ្នែកសេដ្ឋកិច្ច សង្គមកិច្ច និង នយោបាយ ជាពិសេសជះឥទ្ធិពលយ៉ាងខ្លាំង ដល់ភាពរីកចម្រើនរបស់ប្រជាពលរដ្ឋ ខេត្តសៀមរាប។ ក្នុងនោះដែរឯកឧត្តមបណ្ឌិតអភិបាលខេត្ត ក៏បានលើកឡើងនូវសមទ្ធិផលជាច្រើន សម្រាប់អភិវឌ្ឍន៍ខេត្តសៀមរាប ក្នុងអាណត្តិដឹកនាំរបស់ឯកឧត្តមផងដែរ ។ ឯ.ឧបណ្ឌិត ឃឹម ប៊ុនសុង ក៏បានបន្តទៀតថា ការប្រគល់សញ្ញាបត្របណ្ឌិតកិត្តិយសនេះ ជាការបង្ហាញពី ភារកិច្ចបច្ចុប្បន្ន និងទៅអនាគត ដែលអាជ្ញាធរខេត្ត ត្រូវបន្តប្រឹងប្រែង ដឹកនាំអនុវត្តឲ្យបានជោគជ័យ នូវកិច្ចអភិវឌ្ឍខេត្ត ប្រកបដោយនិរន្តរភាព ។ ឯកឧត្តមបណ្ឌិតក៏បានធ្វើការប្តេជ្ញាចិត្ត ក្នុងការដឹកនាំអភិវឌ្ឍន៍ខេត្ត ឲ្យកាន់តែ មានភាពរីកចម្រើន ដោយត្រូវធ្វើការពង្រឹង ពង្រីកបន្ថែម នូវបណ្តាសមទ្ធិផលដែលអាជ្ញាធរខេត្តសម្រេចបានកន្លងមក ដើមី្បភាពរុងរឿងរបស់ប្រជាពលរដ្ឋខេត្តសៀមរាប ប្រកបដោយចីរភាព ។ ក្នុងន័យនេះយើងក៏មានមោទនភាព ដោយព្រះរាជាណាចក្រកម្ពុជាទទួលជ័យលាភីថ្មីមួយទៀត គឺ ”កម្ពុជាជាគោលដៅទេសចរណ៍ដ៏ល្អបំផុតលើពិភពលោក” ដែលផ្តល់ដោយក្រុមប្រឹក្សាទេសចរណ៍ និងពាណិជ្ជកម្មអ៊ឺរ៉ុប និងប្រកាសជាផ្លូវការថា “កម្ពុជាជាគោលដៅទេសចរណ៍វប្បធម៌ពេញនិយមឆ្នាំ២០១៦” ក្នុងនោះ ក៏ជាមោទនភាពសម្រាប់ខេត្តប្រវត្តិសាស្ត្រសៀមរាបផងដែរ ដែលប្រាសាទអង្គរវត្ត ត្រូវបានជាប់ចំណាត់ថ្នាក់ជាគោលដៅទេសចរណ៍មួយ ដ៏ល្អប្រណិតបំផុតនៅក្នុងតំបន់អាស៊ីសម្រាប់ឆ្នាំ២០១៦ ។ ឯកឧត្តមបណ្ឌិតក៏បានបញ្ជាក់ផងដែរ ពីការរួមចំណែករបស់សាកលវិទ្យាល័យ UNIVERSIDAD EMPRESARIAL DE COSTRA RICA ដែលជាដៃគូ បានកំពុងដើរតួនាទី ក្នុងការបណ្តុះបណ្តាលធនធានមនុស្ស កសាងសមត្ថភាពជូនមន្ត្រីរាជការ និសិ្សត និង សាធារណជនទូទៅសម្រាប់ខេត្តសៀមរាប ស្របពេលនឹងកំណើនសេដ្ឋកិច្ច ទំហំទីផ្សារការងារ និង សក្តានុពលដទៃទៀតកំពុងរីកលូតលាស់ក្នុងសង្គមជាតិ ។ ម៉្យាងទៀតសមទ្ធិផលទាំងឡាយ ក៏កើតចេញពីការខិតខំប្រឹងប្រែង របស់ថ្នាក់ដឹកនាំ មន្ត្រីរាជការគ្រប់លំដាប់ថ្នាក់ និងប្រជាពលរដ្ឋគ្រប់មជ្ឈដ្ឋាន ដើមី្បអភិវឌ្ឍន៍ខេត្តសៀមរាប ក្នុងគោលដៅមានភាពស្រស់ស្អាត ដើមី្បទាក់ទាញភ្ញៀវទេសចរណ៍ជាតិ អន្តរជាតិ ដែលជាខេត្តគោលដៅរបស់ភ្ញៀវទេសចរណ៍ លើពិភពលោកទៀតផង ៕ អត្ថបទ ម៉ី សុខារិទ្ធ
