ខេត្តសៀមរាប ៖ នៅព្រឹកថ្ងៃ០៤រោច ខែស្រាពណ៌ ឆ្នាំវក អដ្ឋស័ក ព.ស ២៥៦០ ត្រូវថ្ងៃទី២២ ខែសីហា ឆ្នាំ២០១៦នេះ នៅក្នុងបរិវេណវត្តប្រាសាទគោកចក មានធ្វើពិធីប្រកាសនីយប័ត្រតែងតាំង និង ស្រោចស្រពសុគន្ធវារី ប្រគេនព្រះតេជគុណហែម គឹមសានញាតិធម្មោ ជាព្រះគ្រូចៅអធិការវត្តប្រាសាទគោកចកស្ថិតនៅសង្កាត់គោកចកក្រុង ខេត្ត សៀមរាប ក្រោមព្រះអធិបតីរបស់ព្រះវិមលធម្មពិន សែមព្រះរាជាគណៈថ្នាក់ទោឧត្តមប្រឹក្សាគណៈសង្ឃនាយក សមាជិក ថេរសភា នៃព្រះរាជាណាចក្រកម្ពុជាដោយមានការនិមន្តនិង មានការអញ្ជើញចូលរួមរបស់ព្រះសុមង្គលសិលាចារ្យជុំ គឺមឡេងព្រះមេគណខេត្ត ឯកឧត្តមបណ្ឌិតអ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប ឯកឧត្តម អ៊ឹង ហឿន ប្រធានក្រុមប្រឹក្សាខេត្តស្តីទី លោក ពៅ ពិសិដ្ឋ អភិបាលរង នៃគណៈអភិបាលខេត្ត រួមទាំងព្រះគ្រូចៅអធិការគ្រប់វត្តក្រុង ស្រុក ថ្នាក់ដឹកនាំមន្ទីរ ស្ថាប័ន អង្គភាព សមណៈសិស្ស លោកគ្រូអ្នកគ្រូ យុវជនកាយរឹទ្ធ យុវជនកាកបាទក្រហម សីលវ័ន្ត សីលវតី និងពុទ្ធបរិស័ទចំណុះដែលបានចូលរួម។
បន្ទាប់ពីកិច្ចស្វាគមន៍របស់ព្រះគ្រូប្រាសាទរងី្ស ឡាច លាង ព្រះអនុគណក្រុងសៀមរាប និងការអាននូវប្រកាសនីយប័ត្រ តែងតាំងព្រះភិក្ខុ ហែម គឹមសាន នាមឆាយា ញាតិធម្មោ ដែលងារដើមជាចៅអធិការស្តីទីឲ្យឡើងជាព្រះគ្រូចៅអធិការវត្តប្រាសាទគោកចក ដោយព្រះអង្គជាអ្នករម្ងាប់អធិករណ៍ និងសហការគ្រប់គ្រងគរុភណ្ឌសង្ឃ មានដីធ្លីវត្តអារាម និង អប់រំពុទ្ធសាសនិកជន ឲ្យរៀនសូធ្យបដិបត្តិធម៌ និង វិន័យមានបិដកជាគោល ។
បន្ទាប់ពីព្រះវិមលធម្ម ពិន សែម ប្រគល់ប្រកាសនីយប័ត្រនិងត្រាដល់ព្រះភិក្ខុ ហែម គឹមសាន ដែលជាចៅអធិការវត្តថ្មីដែលទើបប្រកាសតែងតាំងរួចមកការមានប្រសាសន៍នោះដែរ លោក ពៅ ពិសិដ្ឋ អភិបាលរងខេត្ត និងឯកឧត្តមបណ្ឌិតអ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាបដោយបានលើកឡើង ពីការបាត់បង់ ស្ទើរតែសាបសូន្យទៅហើយនៅក្នុងរបបកម្ពុជាប្រជាធិបតេយ្យ នូវវិស័យសាសនានិងហេដ្ឋារចនាសម្ព័ន្ធនានា តែ ដោយគុណបុណ្យស្មារតី ០២ ធ្នូ ១៩៧៨ និងថ្ងៃជ័យជនះ ៧ មករា ១៩៧៩ ក្រោមកិច្ចដឹកនាំប្រកប ដោយគតិបណ្ឌិត ដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រី ក្រោមគោលនយោបាយឈ្នះៗ បានធ្វើឲ្យប្រទេសជាតិទាំងមូល មានសុខសន្តិភាពពេញលេញ និង ធ្វើឲ្យមានការអភិវឌ្ឍន៍រីកចម្រើនទាំងវិស័យពុទ្ធចក្រ និង អាណាចក្រ ហើយ រដ្ឋធម្មនុញ្ញ នៃព្រះរាជាណាចក្រកម្ពុជា បានកំណត់ ជាសាសនារបស់រដ្ឋ ដោយមិនប្រកាន់សាសនាណាឡើយ ក្រោមការជ្រកនៅគុណព្រះសម្មាសាម្ពុទ្ធ ព្រះបរម្យ គ្រូនៃយើង ដោយមិនប្រកាន់គណៈមហានិកាយ គណៈធម្មយុត្តិកនិកាយ ឬ ឥស្លាមសាសនា និង សាសនា កត្តាលិស។ ឯកឧត្តមក៏បានលើកឡើងផងដែរ ពីការបណ្តុះបណ្តាលធនធានមនុស្ស ទាំងពុទ្ធចក្រ និងអាណាចក្រមានការរីកចម្រើន ប្រកបដោយគុណភាពខ្ពស់ ព្រមទាំងសូមឲ្យព្រះសង្ឃ និងពុទ្ធបរិស័ទចំណុះជើងវត្ត ត្រូវចេះរួមសាមគ្គីគ្នា ក្នុងការកសាងទីវត្តឲ្យមានការរីកចម្រើនផងដែរ ។
មានសង្ឃដីកានោះដែរព្រះវិមលធម្មពិន សែមព្រះរាជាគណៈថ្នាក់ទោ ក៏បានផ្តល់នូវពុទ្ធឱវាទប្រគេនជូនដល់ព្រះភិក្ខុសង្ឃ ពុទ្ធបរិស័ទទាំងឡាយយកទៅ គោរពបដិបត្តិ ទៅតាមគន្លងនៃវិន័យព្រះសម្មាសាម្ពុទ្ធ ដែលជា ព្រះ បរម្យគ្រូនៃយើង បានចងក្រងជាគម្ពីបិដកឲ្យគោរព ទៅតាមព្រះធម៌វិន័យរបស់ព្រះពុទ្ធសាសនា ។ ព្រះវិមលធម្ម ក៏បានផ្តល់នូវព្រះដំបូន្មានមួយចំនួន តាមផ្លូវព្រះធម៌ និង ផ្លូវលោក ពុទ្ធចក្រ និង អាណាចក្រ សំខាន់នូវព្រះធម៌ សាមគ្គីធម៌ និង កសាងអភិវឌ្ឍន៍វិស័យព្រះពុទ្ធសាសនា ដោយសាសនាជ្រកក្រោមម្លប់តែមួយនៃរដ្ឋធម្មនុញ្ញ ព្រះរាជា ណាចក្រកម្ពុជា ដែលជាសាសនារបស់រដ្ឋ ។ ព្រះវិមលធម្មពិន សែមក៏បានលើកនូវព្រះវិន័យរបស់ព្រះសម្មាសម្ពុទ្ធក្នុងការដឹកនាំព្រះសង្ឃនៅក្នុងទីវត្ត ដែលជាភារកិច្ចរបស់ព្រះគ្រូចៅអធិការវត្តនិមួយៗត្រូវគោរពប្រតិបត្តិ នូវនាយកធម៌ ទាំង០៦យ៉ាង ដែលជាប្រទីបក្នុងការគ្រប់គ្រងវត្តអារាមប្រកបដោយប្រសិទ្ធភាព និង គ្មានអធិករណ៍អ្វីកើតឡើងនោះ ឡើយ ដោយប្រកាន់នូវធម៌ខន្តី ។ ព្រះវិមលធម្មបញ្ជាក់ថា វត្តអារាមជាទីជំរកអប់រំរិយាធម៌ ដល់ពុទ្ធបរិស័ទ យុវជន ដែលជាទំពាំង ស្នងឬសី្ស និង ជាឱកាសល្អក្នុងការរួបរួមគ្នា ដើមី្បថែរក្សាការពារ សេចក្តីសុខសាន្ត សង្គមជាតិ ដោយប្រកាន់យកព្រះពុទ្ធ ឱវាទជាប្រទីបបំភ្លឺផ្លូវ ក្នុងការអប់រំសីលធម៌ ចរិយាធម៌ សេចក្តីថ្នៃថ្នូរ សមនឹងទស្សនៈដែលថា ព្រះពុទ្ធសាសនាជាកម្លាំងដឹកនាំចរិយាធម៌សង្គម ក្នុងការលុបបំបាត់អំពើហិង្សាសង្គម ។ ព្រះវិមលធម្មពិន សែមក៏បានផ្តាំផ្ញើដល់អាជ្ញាធរគ្រប់ជាន់ថ្នាក់ ទាំងព្រះភិក្ខុសង្ឃ សំខាន់ព្រះភិក្ខុ ហែម គឹមសាន ដែលជាព្រះគ្រូចៅអធិការវត្តប្រាសាទគោកចក ដោយព្រះអង្គជាអ្នករម្ងាប់អធិករណ៍ និង សហការគ្រប់គ្រង គរុភណ្ឌសង្ឃ មានដីធ្លីវត្តអារាម និង អប់រំពុទ្ធសាសនិកជន ឲ្យរៀនសូធ្យបដិបត្តិធម៌ និង វិន័យមានបិដកជាគោល និង រួមសាមគ្គីព្រះសង្ឃ ពុទ្ធបរិស័ទ តាមបណ្តាវត្តនានា ត្រូវធ្វើការអភិវឌ្ឍន៍ទីវត្ត និង បណ្តុះបណ្តាលធនធានមនុស្ស ទាំង ផ្លូវពុទ្ធចក្រ និង អាណាចក្រ ពិសេសការពង្រីកនូវវិស័យពុទ្ធកៈសិក្សា និង អភិវឌ្ឍន៍ និង អភិរក្សនូវវប្បធម៌ ប្រពៃណី ទំនៀមទំលាប់របស់ជាតិផងដែរ ។
ក្នុងនោះដែរឯកឧត្តមបណ្ឌិតអ្នកឧកញ៉ា សៀង ណាំ ក៏បាននាំយកនូវអំណោយជាសារុងចែកជូនប្រជាពលរដ្ឋដែលបានចូលរួម ម្នាក់ៗសារុង១ សីលវ័ន្តសីលវតីម្នាក់ៗក្រណាត់ស ១ដុំ បច្ច័យ ៥ពាន់រៀល ក្រុមយុវជនកាយរឹទ្ធ និង កាកបាទក្រហមម្នាក់ៗ ១ម៉ឺនរៀល ក្នុងនោះសាលាខេត្តក៏បានប្រគេនបច្ច័យចំនួន ១លានរៀល តែចំពោះការរៀបចំពិធីដែលខ្វះខាត ឯកឧត្តមបណ្ឌិតអ្នកឧកញ៉ានិងធ្វើការចេញជូនផងដែរ ។ បន្ទាប់ពីការនិមន្ត អញ្ជើញស្រោចស្រពសុគន្ធវារី ប្រគេនព្រះតេជគុណ ហែម គឹមសាន ញាតិធម្មោ ជាព្រះគ្រូចៅអធិការវត្តប្រាសាទគោកចករួចមកក៏មានធ្វើពិធីដាំកូនឈើ បេង និង គរគី នៅក្នុងទីវត្តប្រាសាទគោកចកនេះផង ដែរ ៕ អត្ថបទលោក ម៉ី សុខារិទ្ធ
