ខេត្តសៀមរាប ៖ លោក នួន មុនី ប្រធានមន្ទីរបរិស្ថានខេត្តឧត្តរមានជ័យត្រូវបានប្រកាសចូលកាន់មុខតំណែងជាប្រធានមន្ទីរបរិស្ថានខេត្តសៀមរាប ជំនួសលោក ភួង លីណា ដែលត្រូវបានផ្ទេរភារកិច្ច ទៅជាប្រធានមន្ទីរបរិស្ថាន ខេត្ត ឧត្តរមានជ័យ កាលពីរសៀលថ្ងៃទី០២ ខែ កុម្ភៈ ឆ្នាំ២០១៧ នៅសាលប្រជុំសាលាខេត្តសៀមរាប ក្រោមអធិបតី ភាពរបស់ឯកឧត្តមបណ្ឌិត យិន គឹមស៊ាន រដ្ឋលេខាធិការក្រសួងបរិស្ថាន ឯកឧត្តមបណ្ឌិត នូ ផល្លា ប្រធាន ក្រុមប្រឹក្សាខេត្ត និង លោក គឹម ឆៃហៀង អភិបាលរង នៃគណៈអភិបាលខេត្តដោយមានការចូលរួមពីសំណាក់ ឯកឧត្តម លោកជំទាវជាសមាជិកក្រុមប្រឹក្សាខេត្ត អនុរដ្ឋលេខាការអស់លោក លោកស្រីជាថ្នាក់ដឹកនាំ មន្ទីរ អង្គភាព អាជ្ញាធរក្រុង ស្រុក និង មន្ត្រីរាជការផងដែរ។
បន្ទាប់ពីធ្វើការអាននូវប្រកាសលេខ០២០ ប្រក.បស្ថ ចុះថ្ងៃទី១២ មករាឆ្នាំ២០១៧ របស់ក្រសួងបរិស្ថាន ស្តីពីការផ្ទេរភារកិច្ចមន្ត្រីរាជការនិងគណៈអធិបតីធ្វើការប្រគល់ត្រារបស់មន្ទីរបរិស្ថាននិងការធ្វើការប្តេជ្ញាចិត្តរបស់លោកប្រធានមន្ទីរថ្មីរួចមកមានប្រសាសន៍សំណេះសំណាលក្នុងឱកាសនោះ ឯកឧត្តមបណ្ឌិតនូ ផល្លាប្រធានក្រុមប្រឹក្សាខេត្តសៀមរាបនិង ឯកឧត្តមបណ្ឌិតយិន គឹមស៊ាន រដ្ឋលេខាធិការក្រសួងបរិស្ថាន ក៏បានធ្វើការកោតសរសើរផងដែរ ពីភាពដឹកនាំរបស់ប្រធានមន្ទីរបរិស្ថានដែលបានផ្លាស់ប្តូរផ្ទេរភារកិច្ចទៅជាប្រធានមន្ទីរបរិស្ថានខេត្តឧត្តរមានជ័យដែលបានខិតខំយកចិត្តទុកដាក់ខ្ពស់ក្នុងកិច្ចអភិវឌ្ឍន៍នៅខេត្តសៀមរាបហើយសមទ្ធិផលដែលសម្រេចបានកន្លងមកនេះ គឺជាគុណប្រយោជន៍ដ៏ឧត្តុង្គឧត្តមនៃប្រជាជាតិ ព្រមជាមួយកម្មវិធីកំណែទម្រង់នានារបស់រាជរដ្ឋាភិបាល ហើយក្នុងបរិបទនៃកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាលសម្រេច បាននូវសមទ្ធិផលជាច្រើគួរជាទីមោទនភាព។ ឯកឧត្តមទាំងពីរក៏បានបញ្ជាក់ថា ការប្រកាសតែងតាំងតួនាទីថ្នាក់ដឹកនាំមន្ទីរនេះ គឺជាប្រពៃណី ទំនៀមទំលាប របស់ថ្នាក់ដឹកនាំ មន្ត្រីរាជការស៊ីវិល ក្នុងជួររាជរដ្ឋាភិបាល ដើមី្បក្នុងការពង្រឹងនូវសមត្ថភាពការងារក្នុងសង្គម លើការអនុវត្តនូវគោលនយោបាយយុទ្ធសាស្ត្រចតុកោណដំណាក់កាលទី៣ នីតិកាល ទី៥នៃរដ្ឋសភា ក្នុងគោលបំណង ដើមី្បធានានូវសុវត្ថិភាពការងារ ការសហការល្អ និង ការប្តេជ្ញាចិត្តខ្ពស់ ស្របតាមគោលការណ៍ទាំងឡាយរបស់រាជរដ្ឋាភិបាល ក្រោមកិច្ចដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី។ ឯកឧត្តមបណ្ឌិត នូ ផល្លា និងឯកឧត្តមបណ្ឌិតយិនគឹមស៊ានក៏បានបញ្ជាក់ថាការប្រកាសចូលកាន់តំណែងរបស់ប្រធានមន្ទីរបរិស្ថានខេត្តសៀមរាបថ្មីនាពេលនេះ គឺជាការប្រគល់ភារកិច្ច និង ជាការផ្តល់នូវការទទួលខុសត្រូវមួយថែមទៀត ដែលតម្រូវឲ្យសាមីខ្លួនត្រូវ តែ បញ្ចេញឲ្យអស់ពីសមត្ថភាពលទ្ធភាព និង ទេពកោសល្យ ដើម្បីជំនះបានរាល់ភាពលំបាកនានា ដែលកើតមាន ឡើងកន្លងមកហើយដែលចាំបាច់ត្រូវសហការជាមួយថ្នាក់ដឹកនាំ និង មន្រ្តីក្រោមឱវាទដើម្បីធ្វើឲ្យអង្គភាពមានការប្រែប្រួលមុខមាត់ថ្មីសំដៅធានារ៉ាប់រងបាននូវភារកិច្ចស្នូលទាំងឡាយ ដែលអង្គភាពត្រូវបំពេញនិង ទទួលខុសត្រូវចំពោះមុខស្ថាប័ន និង ភារកិច្ចទាំងឡាយផ្សេងៗទៀត ទៅតាមការចាំបាច់ដែលរដ្ឋបាលខេត្តប្រគល់ជូន ។ឯកឧត្តម ទាំងពីរ ក៏បានធ្វើការផ្តាំផ្ញើដល់ លោកប្រធានមន្ទីរបរិស្ថានសម្រាប់តួនាទីភារកិច្ចថ្មីនេះ និងលើកទឹកចិត្តចំពោះ បេសកកម្មនានា ដែលត្រូវបំពេញក្នុងការបំរើប្រជាពលរដ្ឋឲ្យបានល្អប្រសើរ។ ទន្ទឹមគ្នានេះ ឯកឧត្តមបណ្ឌិតយិន គឹមស៊ាន ក៏បានចូលរួមចែករំលែកនិងផ្ដល់នូវចំណេះដឹង បទពិសោធន៍មួយចំនួនសម្រាប់លោកប្រធានមន្ទីរបរិស្ថានដែលត្រូវចូលកាន់តំណែងនាពេលនេះក្នុងបរិបទនៃកំណែទម្រង់ស៊ីជម្រៅ ការពង្រឹងអភិបាលកិច្ចនៃការផ្ដល់សេវា និង គោលការណ៍ណែនាំថ្មីៗរបស់រាជរដ្ឋាភិបាលកម្ពុជា ។ ឯកឧត្តមបានគូសបញ្ជាក់ផងដែរថាដើមី្ប ភាពជោគជ័យលើការងារស្នូលរបស់ខ្លួន គឺត្រូវបន្តពង្រឹងប្រពៃណីសាមគ្គីភាពឯកភាពផ្ទៃក្នុងឲ្យកាន់តែល្អប្រសើរបង្កើនប្រសិទ្ធភាពគ្រប់គ្រងមន្រ្តីរាជការមានការពង្រឹងវិន័យ យកចិត្តទុកដាក់អនុវត្តការងារប្រកបដោយការឈ្លាស វៃ និងត្រូវ មានចក្ខុវិស័យសមស្របទៅលើសភាពការណ៍ទូទៅស្របតាមស្ថានភាព និង ត្រូវដោះស្រាយ ឬ ស្នើសុំ គោលការណ៍ដោះស្រាយឲ្យបានទាន់ពេលវេលានិង មានគំនិតផ្តួចផ្តើមភាពច្នៃប្រឌិតខ្ពស់ធ្វើឲ្យការដឹកនាំបានប្រព្រឹត្តទៅប្រកបដោយតម្លាភាពគណនេយ្យភាព និង អភិបាលកិច្ចល្អ។ទន្ទឹមនឹងការអប់រំផ្សព្វផ្សាយ និងការកំណត់ឲ្យច្បាស់នូវមុខសញ្ញាជនល្មើស មន្ទីរបរិស្ថានត្រូវសហការជាមួយសមត្ថកិច្ចពាក់ព័ន្ធ រួមទាំងអាជ្ញាធរដែនដី ទប់ស្កាត់ឲ្យបាននូវបទល្មើសព្រៃឈើ ទាំងក្នុងតំបន់ឧទ្យានុរក្ស ក៏ដូចជាតំបន់ដែលមានសក្តានុពលធនធានធម្មជាតិពាក់ព័ន្ធដទៃទៀត។ វិធានការដែលគួរត្រូវបានយកទៅអនុវត្តគឺត្រូវធ្វើកិច្ចសហប្រតិបត្តិការ ជាមួយគ្នារវាងស្រុក ឬខេត្តជាប់ព្រំប្រទល់គ្នា ដើម្បីធានាបាននូវប្រសិទ្ធភាពក្នុងការបង្រ្កាបបទល្មើសទាំងនោះ។ ជាមួយគ្នានេះ យើងត្រូវ គ្រប់គ្រងនិងអភិរក្សធនធានជីវចំរុះ និងប្រព័ន្ធអេកូលូស៊ីប្រកបដោយ និរន្តភាព។ម៉្យាងទៀតគ្រប់មន្ត្រីបរិស្ថាន និង មន្ត្រីឧទ្យានុរក្សទាំងអស់ត្រូវគោរពឲ្យបាននូវគោលការណ៍របស់រាជរដ្ឋាភិបាល និង ក្រសួងដែលបានកំណត់ ដើមី្បជៀសវាងកុំឲ្យក្រុមអភិរក្សតំបន់ឧទ្យានជាតិ ក្លាយទៅជាជនល្មើស ឬ ជាខ្នងបង្អែករបស់ជនខិលខួច ៕ អត្ថបទ ម៉ី សុខារិទ្ធ
