ខេត្តសៀមរាប ៖ កិច្ចប្រជុំត្រួតពិនិត្យលទ្ធផលការងារគណៈកម្មាធិការពិគ្រោះយោបល់កិច្ចការស្ត្រីនិងកុមារ ឆ្នាំ២០១៦ និង លើកទិសដៅបន្តឆ្នាំ២០១៧ ដែលបានដំណើរការទៅមួយថ្ងៃពេញទៅតាមកម្មវិធីដែលបានគ្រោងទុក ប្រកបទៅដោយលទ្ធផលជាផ្លែផ្កា នៅសាលប្រជុំសាលាខេត្តសៀមរាប ត្រូវបានធ្វើពិធីបិទកាលពីរសៀលថ្ងៃទី០៩ ខែកុម្ភះ ឆ្នាំ២០១៧ ក្រោមអធិបតីភាពឯកឧត្តមបណ្ឌិតនូផល្លាប្រធានក្រុមប្រឹក្សាខេត្ត ។
ឆ្លងតាមរបាយការណ៍បូកសរុបនៃលទ្ធផលកិច្ចប្រជុំ លោកជំទាវ យូ សុភា អនុប្រធានគណៈកម្មាធិការពិគ្រោះយោបល់កិច្ចការស្ត្រីនិងកុមារខេត្ត និង ជាអភិបាលរងខេត្ត បានបញ្ជាក់ថា នេះគឺជាសញ្ញាវិជ្ជមានថ្មីបន្ថែមទៀត ចំពោះ គ.ក.ស.កខេត្ត ក្រុង ស្រុក ក៏ដូចជា គ.ក.ន.ក ឃុំ សង្កាត់ ដែលបាន ធ្វើបទបង្ហាញអំពីលទ្ធផលការងារ នៃការអនុវត្តផែនការសកម្មភាពឆ្នាំ២០១៦ និង បានឆ្លុះបញ្ចាំងពីបទពិសោធន៍ បញ្ហាប្រឈម ការផ្តល់យោបល់អនុសាសន៍របស់ គ.ក.ស.ក ខេត្ត ហើយក៏មានការធ្វើបទបង្ហាញពីលទ្ធផលសម្រេចបាន បទពិសោធន៍ បញ្ហាប្រឈម ដំណោះស្រាយរបស់ គ.ក.ស.ក ស្រុក និង គ.ក.ន.ក ឃុំ ហើយក៏ជាកម្លាំងចលករជម្រុញឲ្យការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិកាន់តែមានការលើកកម្ពស់ដែលពាក់ព័ន្ធទៅនឹងសមភាពយេនឌ័រ ស្ត្រី យុវវ័យ កុមារ និងជនងាយរងគ្រោះ ។
មានប្រសាសន៍បិទកិច្ចប្រជុំនោះឯកឧត្តមបណ្ឌិតនូផល្លា បានលើកឡើងថា កិច្ចប្រជុំនេះដែរ បានឆ្លុះបញ្ចាំងឲ្យឃើញពីការខិតខំប្រឹងប្រែងក្នុងការអនុវត្តសកម្មភាព តួនាទី ភារកិច្ច សិទ្ធិអំណាចនិង ការទទួលខុសត្រូវរបស់គ.ក.ស.កខេត្ត នៅក្នុងដែនសមត្ថកិច្ចរបស់ខ្លួនកាន់តែមានប្រសិទ្ធភាពខ្ពស់។ម៉្យាងទៀតយើងពិតទទួលបាននូវព័ត៌មានបន្ថែមថ្មីៗទៀត នូវបទពិសោធន៍ ចំណុចខ្លាំងចំណុចខ្វះខាត បញ្ហាប្រឈម និង នីតិវិធីដោះស្រាយបញ្ហាទាំងនោះ ដើម្បីឆ្លើយតបតម្រូវការ សមភាពយេនឌ័រ ស្រី្ត យុវវ័យ កុមារ និង ជនងាយរងគ្រោះ នៅមូលដ្ឋានបានល្អប្រសើរ ព្រមទាំងបានជាមូលដ្ឋានសម្រាប់លើកជាយោបល់ និងអនុសាសន៍ជូនក្រុមប្រឹក្សាខេត្ត ក្រុមប្រឹក្សាក្រុង ស្រុក ក្រុមប្រឹក្សាឃុំ សង្កាត់ក្នុងការផ្តល់ការគាំទ្រដល់ការពង្រឹងភាពអង់អាចដល់ស្ត្រីជាអ្នកដឹកនាំ និងជម្រុញឲ្យការងារពាក់ព័ន្ធលើកកម្ពស់សមភាពយេនឌ័រ ស្រី្ត យុវវ័យ កុមារ និង ជនងាយរងគ្រោះ ដើម្បីឈានឆ្ពោះទៅ សម្រេចបានគោលដៅអភិវឌ្ឍសហសវត្ស និង ចក្ខុវិស័យរបស់រាជរដ្ឋាភិបាលកម្ពុជានីតិកាលទី៥ នៃរដ្ឋសភា ក្រោមការដឹកនាំដ៏ឈ្លៀសវៃប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ឯកឧត្តមបណ្ឌិតនូផល្លាបានបន្តទៀតថា ដើម្បីអភិវឌ្ឍសមត្ថភាពដល់ស្រ្តីឲ្យមានភាពអង់អាចក្លាហាន សំដៅលើកកម្ពស់ស្រ្តី ក្នុងភាពជាអ្នកដឹក។ក្នុងដំណើរការកំណែទម្រង់ការអភិវឌ្ឍតាមបែបប្រជាធិបតេយ្យនៅរដ្ឋបាលថ្នាក់ក្រោមជាតិលើកស្ទួយស្វ័យភាពមូលដ្ឋាននិងគោលការណ៍អភិបាលកិច្ចល្អដែលក្នុងនោះត្រូវមានគណនេយ្យភាពតម្លាភាពនិងការផ្តល់សេវាសាធារណៈឲ្យកាន់តែមានប្រសិទ្ធភាពចំពោះប្រជាពលរដ្ឋក្នុងដែនសមត្ថកិច្ចខ្លួន។ឆ្លងតាមរយៈកិច្ចប្រជុំនេះគួបផ្សំនឹងបទពិសោធន៍ល្អៗដែលយើងធ្លាប់បានអនុវត្ដកន្លងមកឯកឧត្តមមានសង្ឃឹមជឿជាក់ថា សិក្ខាកាមទាំងអស់ ប្រាកដជាធ្វើការត្រិះរិះ ពិចារណាដោយសុភវិនិច្ឆ័យ និងមានការប្ដេជ្ញាចិត្ដខ្ពស់ ក្នុងការអនុវត្តតួនាទី ភារកិច្ច ដើម្បីឈានទៅរកការកាត់បន្ថយជាបណ្តើៗ នូវបញ្ហាប្រឈមនានា និងបំពេញបាននូវសេចក្តីត្រូវការរបស់ស្ត្រី យុវវ័យ កុមារ និងជនងាយរងគ្រោះ ឲ្យបានជាអតិបរមានៅថ្នាក់មូលដ្ឋានខ្លួន។ក្នុងនោះឯកឧត្តមបណ្ឌិតក៏បានផ្តល់នូវអនុសាសន៍ល្អៗមួយចំនួនព្រមទាំងលើកនូវនីតិវិធីច្បាប់ ហើយជាមួយគ្នានេះដែរក៏បានផ្តាំផ្ញើផងដែរដល់ក្រុមប្រឹក្សាក្រុងស្រុក និងក្រុមប្រឹក្សាឃុំសង្កាត់ ជាមួយគ្នានេះដែរ ក្រុមប្រឹក្សាក្រុងស្រុកនិងក្រុមប្រឹក្សាឃុំសង្កាត់ ត្រូវយកចិត្តទុកដាក់ធ្វើឲ្យមានភាពស៊ីសង្វាក់គ្នារវាងផែនការអភិវឌ្ឍន៍របស់ខ្លួន ដោយសហការជាមួយអាជ្ញាធរពាក់ព័ន្ធ ដៃគូអភិវឌ្ឍទាំងអស់ ដើម្បីបន្ស៊ីរាល់ផែនការសកម្មភាពរវាងគ្នានឹងគ្នាសំដៅធ្វើឲ្យសម្រេចនូវការអភិវឌ្ឍតាមបែបប្រជាធិបតេយ្យនៅរដ្ឋបាលថ្នាក់ក្រោមជាតិ ។ម៉្យាងទៀតចំណុចដែលលើកឡើងគឺជាត្រីវិស័យមួយសម្រាប់ចង្អុលបង្ហាញណែនាំបន្ថែមដល់ថ្នាក់ក្រុងស្រុក ឃុំសង្កាត់ ដើម្បីធ្វើជាមូលដ្ឋានក្នុងការចាត់ចែងអនុវត្ដការងាររបស់ខ្លួន គួបផ្សំនឹងគំនិតច្នៃប្រឌិត បទពិសោធន៍ដែលធ្លាប់មានកន្លងមកនិង ដើម្បីយកទៅអនុវត្តបន្តក្នុងឆ្នាំ២០១៧ ខាងមុខនេះ ឲ្យកាន់តែមានប្រសិទ្ធភាព និងសម្រេចបានជោគជ័យតាមផែនការដែលបានការគ្រោងទុក ៕ អត្ថបទ ម៉ី សុខារិទ្ធ
